పండింది పుష్కలం…కొనుగోలు చేసింది ప్రభుత్వం…అయినా బియ్యం ధరలకు రెక్కలు...

పండింది పుష్కలం…కొనుగోలు చేసింది ప్రభుత్వం…అయినా బియ్యం ధరలకు రెక్కలు...

ధాన్యం మిగులు ఎక్కడికి పోతోంది?బియ్యం మార్కెట్‌ పై మిల్లర్లు,ప్రైవేటు వ్యాపారుల పట్టు ఎంత?

ప్రభుత్వాల పర్యవేక్షణ ఏది?

ప్రత్యేక పరిశీలన – తెలుగు రాష్ట్రాలు

అన్నం పెట్టే రైతు ఒకవైపు… అన్నం కొనలేక ధరల భారాన్ని మోస్తున్న సామాన్యుడు మరోవైపు! తెలుగు రాష్ట్రాల్లో వరి సాగు విస్తీర్ణం పెరుగుతోంది. ఖరీఫ్, రబీ సీజన్లలో భారీగా ధాన్యం దిగుబడి వస్తోంది. ప్రభుత్వాలు రైతుల నుంచి వేల కోట్ల రూపాయల విలువైన ధాన్యాన్ని కొనుగోలు చేస్తున్నామని ప్రకటిస్తున్నాయి. అయినప్పటికీ సామాన్య కుటుంబాల వంటింట్లో బియ్యం ధరల భారం ఎందుకు తగ్గడం లేదు? ఈ ప్రశ్నకు సమాధానం చెప్పాల్సిన బాధ్యత కేంద్ర, రాష్ట్ర ప్రభుత్వాలపై ఉంది.

గత ఏడాది సుమారు 390 లక్షల టన్నుల దిగుబడి… ప్రజల అవసరాలు ఎంత?

అందుబాటులో ఉన్న అంచనాల ప్రకారం ఆంధ్రప్రదేశ్, తెలంగాణ తెలుగు రాష్ట్రాల్లో సంవత్సరానికి సుమారు 390 లక్షల టన్నుల వరి ధాన్యం దిగుబడి వస్తోందని,ఇందులో సుమారు 210 లక్షల టన్నుల ధాన్యాన్ని ప్రభుత్వాలు కొనుగోలు చేస్తున్నాయని వ్యవసాయ వర్గాల్లో చర్చ జరుగుతోంది.అదే సమయంలో ప్రజల సాధారణ గృహ వినియోగ అవసరాలకు సంవత్సరానికి సుమారు 130 లక్షల టన్నుల ధాన్యం అవసరమని ఒక అంచనా తీసుకుంటే, మిగిలే ధాన్యం నిల్వలు, ఇతర అవసరాలకు వెళ్లే పరిమాణం ఎంత? దాని లెక్కలు ఎక్కడున్నాయి?

ఇక్కడ ఒక విషయాన్ని స్పష్టంగా గుర్తించాలి. ప్రభుత్వ కొనుగోలు అనేది మొత్తం దిగుబడిలో భాగమే. దిగుబడిలో మిగులు, ప్రభుత్వ కొనుగోలులో మిగులు రెండింటినీ కలిపి లెక్కించడం సరికాదు. అలాగే ధాన్యం నుంచి బియ్యం తయారయ్యే సమయంలో వచ్చే తవుడు, నూకలు, ఇతర ఉప ఉత్పత్తులు, విత్తనాలు, పశువుల మేత, పారిశ్రామిక అవసరాలు, నిల్వలు వంటి అంశాలను కూడా పరిగణనలోకి తీసుకోవాలి.అయితే ఈ వివరాలన్నీ కలిపి తెలుగు రాష్ట్రాల ప్రజలకు అందుబాటులో ఉంచాల్సిన బాధ్యత ప్రభుత్వాలదే.

ప్రభుత్వ కొనుగోళ్లు జరుగుతున్నా ధరల నియంత్రణ ఎందుకు లేదు?

రైతుల నుంచి కనీస మద్దతు ధరకు ధాన్యం కొనుగోలు చేస్తున్నామని ప్రభుత్వాలు చెబుతున్నాయి. కానీ ఆ ధాన్యం మిల్లులకు చేరిన తర్వాత ఎంత బియ్యం ఉత్పత్తి అవుతోంది? ఎంత బియ్యం ప్రభుత్వ ప్రజాపంపిణీ వ్యవస్థకు వెళ్తోంది? ఎంత ప్రైవేటు మార్కెట్‌ లోకి వస్తోంది? ఎంత నిల్వ చేస్తున్నారు? ఏ వ్యాపార సంస్థల చేతుల్లో ఎంత నిల్వ ఉంది?ఈ ప్రశ్నలకు స్పష్టమైన సమాధానాలు ప్రజలకు అందుబాటులో ఉన్నాయా?ప్రభుత్వం రైతు నుంచి ధాన్యం కొనుగోలు చేసినంత మాత్రాన వినియోగదారుడికి తక్కువ ధరకు బియ్యం అందుతుందని భావించలేం. మిల్లింగ్, రవాణా, నిల్వ, మార్కెట్ ఖర్చులు ఉన్నప్పటికీ వాటి పేరుతో ఎంత ధర పెరుగుతోంది? వాస్తవ ఖర్చులు ఎంత? వ్యాపారుల లాభాల మార్జిన్ ఎంత? అనే అంశాలపై సమగ్ర తనిఖీలు అవసరం.

బ్లాక్ మార్కెట్‌ కు అవకాశం ఎక్కడి నుంచి?

ధాన్యం, బియ్యం నిల్వలపై సరైన పర్యవేక్షణ లేకపోతే కృత్రిమ కొరత సృష్టించే అవకాశం ఉంటుంది. కొందరు వ్యాపారులు పెద్ద మొత్తంలో నిల్వలు ఉంచి మార్కెట్‌లో సరఫరాను ప్రభావితం చేస్తున్నారా? మిల్లుల నుంచి హోల్‌ సేల్ వ్యాపారులకు, అక్కడి నుంచి రిటైల్ దుకాణాలకు చేరే సరఫరా గొలుసులో ఎక్కడైనా ధరల కుమ్మక్కు జరుగుతోందా?ఇవి ఆరోపణలుగా తేల్చేయాల్సిన అంశాలు కావు. ప్రభుత్వ దర్యాప్తు, నిల్వల తనిఖీలు, కొనుగోలు–అమ్మకాల రికార్డుల పరిశీలన ద్వారా వాస్తవాలను బయటపెట్టాల్సిన అంశాలు.కేంద్ర, రాష్ట్ర ప్రభుత్వాల పౌరసరఫరాల శాఖలు, వ్యవసాయ శాఖలు, విజిలెన్స్ విభాగాలు ఈ వ్యవస్థపై సమన్వయంతో పర్యవేక్షణ చేపట్టాల్సిన అవసరం ఉంది.

ఎన్నికల సమయంలో నగదు పంపిణీ… ఆ డబ్బు ఆర్థిక వ్యవస్థలో ఎక్కడి నుంచి వస్తోంది?

ఎన్నికలు వచ్చినప్పుడల్లా ఓటర్లను ఆకర్షించేందుకు నగదు పంపిణీ, ఉచిత హామీలు, వివిధ ప్రలోభాల అంశాలు చర్చకు వస్తున్నాయి. ప్రజాస్వామ్యంలో ఓటు విలువను డబ్బుతో కొలవడం ప్రమాదకరం.సామాన్యుడు రోజువారీ అవసరాల కోసం అధిక ధరలకు బియ్యం కొనుగోలు చేస్తూ తన ఆదాయంలో పెద్ద భాగాన్ని ఖర్చు చేస్తున్న సమయంలో ఎన్నికల వేళ ఓటుకు డబ్బు పంపిణీ చేసే ధోరణి వెనుక ఉన్న ఆర్థిక వనరులపై కూడా సమాజం ప్రశ్నించాలి.అయితే బియ్యం ధరల పెరుగుదల వల్ల వచ్చిన డబ్బే ఎన్నికల్లో పంపిణీ అవుతోందని ఆధారాలు లేకుండా చెప్పలేం.కానీ ఎన్నికల ఖర్చుల పారదర్శకత,అక్రమ నగదు ప్రవాహం, వ్యాపార లావాదేవీలపై నిఘా ఉండాలని ప్రజలు కోరుకోవడం సహజం.

ఓటుకు ఇచ్చే కొద్దిపాటి నగదు కోసం ఐదేళ్ల పాటు అధిక ధరలు చెల్లించాల్సి వస్తే చివరికి నష్టపోయేది సామాన్య ఓటరే కాదా?

ఎల్‌.ని.నో ప్రభావం పేరుతో ధరల పెరుగుదలకు సమర్థన ఎంతవరకు?

వాతావరణ మార్పులు, ఎల్‌నినో ప్రభావం, వర్షపాతం లోటు, సాగునీటి సమస్యలు వ్యవసాయ దిగుబడులపై ప్రభావం చూపవచ్చు. అయితే ప్రతి ధరల పెరుగుదలకూ ఎల్‌నినోను కారణంగా చూపించడం సరైన మార్కెట్ విశ్లేషణ కాదు.దిగుబడి పుష్కలంగా వచ్చిన సంవత్సరాల్లో కూడా బియ్యం ధరలు ఎందుకు తగ్గడం లేదు.పాత నిల్వలు ఎంత ఉన్నాయి.కొత్త పంట మార్కెట్‌ లోకి వచ్చినప్పుడు ధరలపై ఎలాంటి ప్రభావం పడింది.నిల్వల పరిమితులు అమలవుతున్నాయా? వంటి అంశాలను పరిశీలించాలి.వాతావరణ పరిస్థితులను కారణంగా చూపుతూ మార్కెట్‌ లో జరిగే అక్రమ నిల్వలు, కృత్రిమ కొరత, అధిక లాభాల వ్యాపారాన్ని విస్మరించకూడదు.

రైతుకు గిట్టుబాటు ధర… వినియోగదారుడికి అందుబాటు ధర ఎప్పుడు?

వరి పండించే రైతుకు మాత్రం గిట్టుబాటు ధర లభించదు.అదే సమయంలో బియ్యం కొనుగోలు చేసే పేద, మధ్యతరగతి కుటుంబాలకు అందుబాటు ధరలో నాణ్యమైన బియ్యం లభించాలి. ఈ రెండింటి మధ్య సమతుల్యత సాధించడమే ప్రభుత్వ ఆహార విధానానికి అసలైన పరీక్ష.ప్రభుత్వాలు కేవలం ధాన్యం కొనుగోలు గణాంకాలు ప్రకటించడం కాకుండా ధాన్యం నుంచి బియ్యం వరకు ప్రతి దశలో పారదర్శకత తీసుకురావాలి. రైతుకు చెల్లించిన ధర, మిల్లింగ్ ఖర్చు, రవాణా ఖర్చు, నిల్వలు, బియ్యం మార్కెట్ ధరల మధ్య ఉన్న వ్యత్యాసాన్ని ప్రజలకు తెలియజేయాలి.

ప్రభుత్వాల ముందు ప్రజల ప్రశ్నలు

ఆంధ్రప్రదేశ్,తెలంగాణ తెలుగు రాష్ట్రాల్లో ఖరీఫ్, రబీ సీజన్ల వారీగా వాస్తవ ధాన్యం దిగుబడి ఎంత?

ప్రభుత్వాలు కొనుగోలు చేసిన ధాన్యం ఎంత? అందులో రైతులకు ఎంత చెల్లించారు?

ప్రభుత్వ కొనుగోలు ధాన్యం నుంచి ఉత్పత్తి అయిన బియ్యం ఎంత?

ఎఫ్‌.సీ.ఐ, రాష్ట్ర గిడ్డంగులు, ప్రైవేటు మిల్లుల్లో ప్రస్తుతం ఉన్న ధాన్యం, బియ్యం నిల్వలు ఎంత?

ప్రజాపంపిణీ వ్యవస్థకు ఎంత బియ్యం కేటాయిస్తున్నారు? ఎంత పంపిణీ అవుతోంది?

ప్రైవేటు మిల్లర్లు, హోల్‌సేల్ వ్యాపారుల నిల్వలపై ఎప్పటికప్పుడు తనిఖీలు జరుగుతున్నాయా?

కృత్రిమ కొరత సృష్టించి అధిక ధరలకు విక్రయించే వారిపై ఎన్ని కేసులు నమోదు చేశారు?

బియ్యం ధరల పెరుగుదలకు వాస్తవ కారణాలపై కేంద్ర, రాష్ట్ర ప్రభుత్వాలు సంయుక్త నివేదిక విడుదల చేస్తాయా?

అన్నం పండించే నేలలోనే అన్నం ధరల భారం ఎందుకు?

రైతు చెమటతో పండిన ధాన్యం ప్రజల ఆకలి తీర్చడానికి ఉపయోగపడాలి. అది కొద్దిమంది వ్యాపారుల నిల్వల వ్యూహాలకు, మార్కెట్ ఆధిపత్యానికి, ధరల అస్థిరతకు కారణం కాకూడదు.ప్రభుత్వాలు రైతుల నుంచి ధాన్యం కొనుగోలు చేయడం ఎంత ముఖ్యమో, అదే ధాన్యం ప్రజలకు సరసమైన ధరకు చేరేలా చూడటం కూడా అంతే ముఖ్యం.

దీనిని కూడా చదవండి.... https://studiobharat.com/Election-twist-given-leaders-people-Jaggayyapet

ఓటు వేసే ముందు ఓటరు ఆలోచించాలి… రైతు పండించిన ధాన్యం ఎక్కడికి వెళ్తోంది.ప్రజలు కొనే బియ్యం ధరలను ఎవరు నిర్ణయిస్తున్నారు.ప్రభుత్వాల వద్ద నిల్వల లెక్కలు ఉన్నప్పుడు ప్రజలకు ధరల భారం ఎందుకు...

ప్రజలకు కావాల్సింది ఎన్నికల సమయంలో ఇచ్చే తాత్కాలిక నగదు కాదు… ఏడాది పొడవునా అందుబాటు ధరలో లభించే నిత్యావసర సరుకులు.ప్రభుత్వాలకు కావాల్సింది ప్రచార గణాంకాలు కాదు…ప్రజలకు జవాబుదారీగా ఉండే పారదర్శక ఆహార విధానం.ధాన్యం పుష్కలంగా పండిన నేలలో బియ్యం ధరలపై సామాన్యుడు కన్నీరు పెట్టుకోవాల్సిన పరిస్థితి ఎందుకు ఏర్పడుతోంది.ఈ ప్రశ్నకు సమాధానం చెప్పాల్సిన బాధ్యత కేంద్ర,రాష్ట్ర ప్రభుత్వాలదే.